Euriagatik ezarritako alerta gorriak eguerdia arte iraungo du; izan ere, goizean ekaitz giroa izango da eta txingorra egitea ere ohikoa izango da. Era berean, elur-kota 800 eta 1.000 metro inguruan izango dela iragarri du euskal meteorologia agentziak. Arratsaldetik aurrera zaparradak modu tartekatuagoan egingo ditu, eta bihar, martitzena, prezipitazio gutxiago espero da. Dena den, giro hotzak jarraipena izango du, tenperaturak antzekoak izango direlako eta mendi inguruetan izotza egingo duelako.
Errekak hazita eta Urkulu gainezka
Euri-jasa handiak izan dira azken egunotan. Zapatuan, hilaren 7an, Elorregiko estazioan 21,4 litro jaso ziren metro koadroko, eta Urkulun, 16,1; domekan, ostera, gehiago: 41,3 litro metro koadroko Elorregin, eta 36,9, Urkulun. Horren ondorioz, Arrasatetik pasatzen den Aramaio erreka zein Deba ibaia asko hazi dira, eta atzo, esaterako, Elorregiko bidegorriko tunela urez bete zen.
Urkulu urtegia, ostera, %100era iritsi da, eta gainezka egin du.
