Arrasateko Uarkape frontoia guztiz bete da gaur arratsaldean Gipuzkoako Bertsolari Txapelketako azken finalerdiaren testigu izateko. Iñigo Mantzizidor, Oihana Iguaran, Andoni Rekondo, Eñaut Martikorena, Maider Arregi eta Agin Laburu izan dira oholtzan kantuan aritu diren sei bertsolariak. Abenduaren 14an Donostian jokatuko den finalerako txartela zuten jokoan, eta Oihana Iguaran izan da irabazlea 519 punturekin.
Saioan oso ondo ikusi ditu kideak Iguaranek, saio onaren irudipena izan du: "Andoni ikusten nuen sendo, Maider ere bai. Mantxi ere gozatzen ikusi dut ariketa batzuetan. Agin ere oso-oso goitik ikusten nuen eta ez genekien non kokatu eta nola joango zen. Giroa ere oso ona izan da, eta horrek zalantza sortzen dizu zenbateraino den erreala".
Arregi, hirugarren
Bigarren sailkatu da Andoni Rekondo 513,5 punturekin (finalean izango da); hirugarrena izan da Maider Arregi oñatiarra 511 punturekin; Agin Laburu, laugarren, 499 punturekin; bosgarrena izan da Eñaut Martikorena lizaso 482 punturekin, eta seigarrena, Iñigo Mantzizidor 478 punturekin.
Hatz puntekin ukitu du finala oñatiarrak, finalean sartu den zortzigarren bertsolariak, Aner Peritz Euzkitze-k 512 puntu baitzituen. "Gustura" ibili da Arregi taula gainean. Adierazi du kostatu egin zaiola apur bat saioan sartzea, baina bigarren ariketatik aurrera oso gustura ibili naiz: "Zortziko txikian Oihanarekin, seiko motzean ere bai Mantxi-rekin. Eta bakarka ere gustura ibili naiz".
Orokorrean, txapelketaren balorazio "ona" egin du oñatiarrak: "Nire helburua zen finalaurrekora heltzea, horrela Euskal Herriko Txapelketara sailkatzen baikara. Hasierako helburua hori izan arren, gero esaten nuen, ea finala... Baina listo. Gertu geratu naiz eta gustura geratu naiz egindakoarekin".
Finala, abenduaren 14an
Gipuzkoako Bertsolari Txapelketako finala abenduaren 14an izango da Ilunben 17:00ean, eta sailkatu diren bertsolariak hurrengoak dira: Beñat Gaztelumendi, Alaia Martin, Oihana Iguaran, Ane Labaka, Nerea Elustondo, Eneritz Artetxe, Andoni Rekondo eta Aner Peritz Euzkitze.
Maider Arregik aurreratu du ikusleen artean izango dela, eta Alaia Martin eta Oihana Iguaran dira bere faboritoak: "Nire ustez, buruz burukora helduko dira biak".
