BPTDk, Debabarreneko industria elkarteak, eta Enpresarek, Bergarako eta inguruetako industria enpresen elkarteak, lankidetza-hitzarmena berritu eta "indartu" dutela jakinarazi dute, eta aliantza horrek helburu duela "elkarte horiek lehendik zuten harremana sendotzea, proiektu komunak eta lankidetza-ekimenak sustatuz". Are gehiago, erantsi dute bi elkarteek "konpromiso sendoa" dutela "industria-sarea hobetzeko", eta "asmoa argia: aurkezten zaizkigun erronkei aurre egitea, enpresen arteko sareak indartuz".
Hain zuzen ere, atzo, hilaren 28an, egin zuten akordioa sinatzeko ekitaldia, eta Iñigo Perez-Arregik, BPDTko presidenteak, "enpresa-sareak indartzeak" dakarrenean egin du azpimarra: "Gure industria-enpresek proiektuetan batera parte-hartzeko aukera ematen du, jarduera ekonomikorako aukera berriak sortuz eta lehiakortasunean irabaziz". Alain Vivasek, berriz, Enpresareko lehendakariak, erantsi du: "Gaur egun, enpresa industrialek dituzten erronkak ez dira gutxi, baina uste dugu lankidetzatik errazago gaindituko ditugula. Batasunak indartsuago egiten gaituelako, eta horri esker hazteko aukera berriak sor daitezkeelako gure enpresetan".
