Debagoieneko Antzerki Plataformak (DAP) antolatu duen hirugarren Karoi Debagoieneko Antzerki Jaialdiaren baitan, DAP Eguna antolatu du biharko, zapatua. Oñatiko Eltzia eraikinean elkartuko dira, 14:00etan, elkarrekin bazkalduko dute, eta, antzerkiaren bueltako egun-pasa borobiltzeko, Inpro-gaua egingo dute, Egoitz Aizpururen eskutik. Ateak zabalik daude interesa dutenentzako.
Goizerako, baina, beste proposamen bat egin dute DAPekoek: Arrasateko Juan Arzamendi Musika Etxean (JAME) elkartuko dira, 11:00etan, Behatxulo sormen prozesuaren baitan lantzen ari diren bi antzezlan aurkezteko: Eider Martiarenak, Nerea Elortzak eta Amaia Santamariak Atalak izenekoa egingo dute, 11:30ean hasita, eta, 12:00etako mokadutxoaren ostean, Amimona antzeztuko dute Irene Balzategik eta Ane Zabalak, 12:30ean hasita.
