Oñatiko Fagor Profesional Aloña Mendi taldeak garaipen garrantzitsua lortu du bergararren aurka. Defentsa sendoa eta eraso zuzena izan dute partida osoan zehar eta azkenean garaipena ospatu ahal izan dute. Bergarako jokalariak, ordea, ez dira azken emaitzarekin ez eta egindako partidarekin pozik geratu.
Jendez lepo egon da Zubikoa gaurkoan. Urte askoan oñatiarrak Euskadiko Txapelketan egon direnez aspaldian ez da oñatiarren eta bergararren arteko derbirik egon. Gogoz, urduri baina motibaturik iritsi dira bi taldeetako kideak kiroldegira eta publikoaren animo oihuak momentu oro entzun dira.
Oñatiarrek hasieratik erakutsi dute indarra defentsan, eta poliki-poliki, erasoan ere erritmoa hartzen joan dira. Lehen minutuetatik hartu dute aurrea markagailuan etxekoek eta lehenengo zati osan zehar nahiko erraz mantendu dute abantaila atsedenaldira 12-6 iritsiz. Bergarako taldeak, aldiz, ez du aurkitu erritmoari eusteko modua bai defentsa zein erasoan akatsak egin baitituzte. Zaila egin zaie hasieran lorturiko abantailari buelta ematea. Bigarren zatian aldaketa nabaria izan den arren, etxekoak partida geldotu dute aurkariek erritmo aldaketa lortzeko helburua zuten arren. Soraluce BKE taldeak azken 12 minutuetan lortu du partidua apur bat bereganatzea, hala ere, ez da nahikoa izan lehengo zatian egindako akatsak konpontzeko. 22-17 amaitu da partida txalo zaparrada artean.
Ligan garaipen bakarrarekin iritsi da Fagor Profesional Aloña Mendi taldea partidara eta Soraluce BKE hiru garaipenekin. Oñatiarrek gaurko emaitzaren ondoren erritmoa mantendu eta aurretiazko bolada txarra alde batera uztea espero dute. Hurrengo partidetan erritmo bera mantentzea da orain erronka.
Emaitzak Bergarako taldeari min handia egin dio, eta kapitainak onartu du gaurko akatsak hurrengo partiduetan zuzentzeko beharra dagoela. Hala ere, Bergarako jokalariek etorkizunari begira jarraitzen dute eta etxean garaipena eskuratzeko aukera berria izango dute.
