Ikastolen Elkarteko elkartasun kutxak 736.000 euro banatuko ditu, lau ikastola eta Kanboko Ikastolen Etxea laguntzeko, hain zuzen ere: Tuterako Argia eta Lodosako Ibaialde ikastolentzako laguntza zehaztu dute, 120.000 euro emango baitizkiote bakoitzari; horrez gain, Argantzon ikastolak 50.000 euro jasoko ditu eta Senpereko Kattalin Elizalde kolegioak, berriz, 300.000 euro; are gehiago, bigarren lanen faseari ekinez gero, 100.000 euro gehiago banatuko dituzte. Azkenik, Kanboko Ikastolen Etxerako 46.271 euro zehaztu dituzte.
Nekane Artolak, Ikastolen Elkarteko lehendakariak, azpimarratu duenez, "halako ekimen baten atzean ez daude soilik datu ekonomikoak: Elkartasuna, lurraldetasuna eta taldekotasunaren praktika ere bada ekimen hau, taldeak norberaren errealitate eta egoeratik harago begiratzeko aukera ematen baitigu. Iparra markatzen digu galduta gaudenean, babesa ematen digu garai zailetan, eta pozak partekatzeko ospakizunak antolatu eta erabakiak hartzeko sendotasuna ematen digu. Beraz, gure izatearen oinarri dela esan dezakegu".
