Udal Finantzaketarako Foru Funtsa (UFFF) da Gipuzkoako udalen finantzaketa mekanismo nagusia. Ogasun eta Finantzetako foru diputatu Itziar Agirrek asteon iragarri du mutualisten epaiak eragina izango duela ekitaldiko diru banaketan. Udalek ekitaldirako aurreikusitakoa baino %3,4 gutxiago jasoko dute. Debagoiena eskualdeko Gipuzkoako zortzi udalerriei dagokienez, 1.876.072 euro gutxiago izango dira. Hala ere, Agirrek azpimarratu du 2023ko ekitaldian baino %2,4 gehiago dela.
Ogasun eta Finantzetako foru diputatuak adierazi du aurreikuspen horiek betetzen badira lurraldeko udalerriek itzuli egin beharko dutela zenbateko hori eta 2025eko ekitaldiko lehen ematearekin batera likidatuko dela. Behin betiko zenbatekoak 2025eko otsailean ezagutuko dira, 2024ko diru-bilketaren eta ekarpenen benetako zifrak jakin ondoren.
2025eko aurreikuspenari dagokionez, Agirrek aurreratu du UFFFren zuzkidura %7 haztea espero dela. Egindako aurreikuspenak betetzen badira, Debagoieneko udalek 56.715.902 euro jasoko dituzte.
| Udalerria | Biztanleak (2023) | Biztanleko euroak (2024) | Biztanleko euroak (2025) |
| Antzuola | 2.082 | 841 | 892 |
| Aretxabaleta | 7.155 | 838 | 898 |
| Arrasate | 21.867 | 846 | 898 |
| Bergara | 14.487 | 850 | 897 |
| Elgeta | 1.119 | 851 | 1.091 |
| Eskoriatza | 4.194 | 845 | 898 |
| Leintz Gatzaga | 194 | 1.257 | 2.153 |
| Oñati | 11.567 | 847 | 898 |
Herri txikien finantzaketa
Bestetik, ekitaldi honi dagokionez, nobedade da udalerri txikiak finantzatzeko foru-arauren aldaketa. 1.100 biztanle baino gutxiagoko udalerriak –Leintz Gatzaga– eta Elgeta izango dira onuradun. Biztanleriaren arabera dagokien kuota jasotzeaz gain, aurten UFFFren %1,2 banatuko zaie zati beretan –8 milioi euro–, eta 244.969 euro gehiago udalerri bakoitzeko.
