Atzo, zapatua, 08:00etan hasi zuten Basajaun lasterketa Gasteizen, eta ziklistek dagoeneko 30 ordu inguru daramatzate bizikleta gainean. 300 lagun inguruk hasi zuten lasterketa –ea zenbat iristen diren helmugara– eta orain momentuan (13:55) Mikel Roldan aretxabaletarra seigarren postuan dago.
Ziklistek 5 egun dituzte 800km egiteko (15.000m-tako desnibelaz) eta Roldanek iaz 62 ordu erabili zituen 11. sailkatzeko. Oraingoz seigarren doa, eta Bardeak atzean utzita Demandako zerrarantz (Errioxa) doaz.Hemen ikus daiteke ziklista bakoitza non doan. Helmuga Gasteizen dute.
Bada, lasterketa horretan esperientzia duten Roldanekin eta Aristegirekin batera oñatiar koadrila ere esperientziara batu da, eta lasterketan buru-belarri dabitza, besteak beste, Iker Agirrebalzategi, Aimar Lizarra, Mikel Biain eta Andoni Guridi. Lasterketa non-stop formatuan egiten dute, eta ziklista bakoitza moldatu behar da jatekoak eta edatekoak kudeatzeko, eta bakoitzak erabakitzen du atsedena non hartu, eta zelan. Bistan dagoena da gaur bero galantari egin beharko diotela aurre.
