Ikasleen %30 eskuko telefonorik gabe joango da 2024-2025 ikasturtean Bergarako Ipintza institutuko Derrigorrezko Bigarren Hezkuntzako lehenengo mailara, Bergarako San Martin, Antzuolako eta Elgetako ikastetxeetako Altxa Burua taldeetako kideek jakinarazi dutenez: "Kezka izaten da gurasoen artean euren seme-alabek gainontzeko ikaskideek telefonoa dutela esatean eta eurek ez, baina emandako datu honekin esan nahi diegu lasai egoteko, ez daudela bakarrik". Haien hitzetan, egun gero eta kontzientzia gehiago dago pantailen erabilerari dagokionez, eta bide horretan urratsak egiten jarraitu nahi dute.
Hala, Ipintza institutuarekin batera, lanketa bat egiten hasiko dira irailean, Eusko Jaurlaritzako Hezkuntza Sailak hala aginduta gai honen inguruan protokolo bat egitea baitagokio ikastetxe bakoitzari urtea amaitu aurretik.
