Hiru ardatz nagusi izango ditu proiektu estrategikoak: ongizatea, trantsizio ekosoziala eta sozioekonomia. "Bizi ditugun garaiek, erantzun berriak eta politika egiteko bestelako moduak eskatzen dituzte. Betiko inertziak jarraitzea ez da aukera bat. Politika anbiziotsuak behar dira. Debagoienean badaude baldintzak jauzi kualitatibo bat emateko. Udalgintzan erakutsi ditugun kudeaketa gaitasuna eta sormena eskualde-eskalara eramatera goaz" azaldu dute.
Eragile eta norbanakoei aurkezpenera bertaratzeko deia luzatu diete: "EH Bildutik eskua luzatzen diegu eskualdeko eragile sozial eta ekonomikoei, baita gizarte zibilari ere, bide hau elkarrekin egiteko".
Aurkezpen saiorako sarrera irekia izango da baina izena aldez aurretik emateko eskatu dute antolatzaileek. Horretarako, nahikoa izango da izen-abizenak eta herria adieraztea honako esteka honetan.
