Zapatuan Gipuzkoako eskolarteko erlojupekoko proba jokatu zuten Zumaian, eta bailarako ziklista kuadrilla polita izan zen bertan lehian.
Infantil emakumezkoen kasuan Aloña Mendikoek eta Dorletako Amakoek indarrak batu zituzten, eta bigarren sailkatu ziren. "Emakumezkoen sei talde batu ziren guztira, eta gurea moduko lurralde baterako kopuru polita da, baina gizonezkoetan 20 talde izan ziren eta oraindik nesken ziklismoa sustatzen jarraitu behar dugu. Hala, federaziotik pentsatu genuen polita izango zela Zumaian protagonista izan ziren neskak hurrengo egunean Donostian amaitu behar zuten Itzulia Womeneko sari banaketa ekitaldira gonbidatzea. Eta sariak banatu ostean oso une polita egon zen, Itzuliako irabazle Demi Volleringek talde argazkia egiteko eskatu zielako gure txirrindulariei", adierazi du Aloña Mendiko ziklismo saileko presidente eta federazioko ordezkari Aitor Atorrasagastik.
