Gaztetxoen artean eskuko telefonoaren erabilerak kezkatuta Altxa Burua mugimendua sortu da azken hilabeteetan Gipuzkoako hainbat herritan. Eta orain, Aretxabaleta, Eskoriatza eta Leintz Gatzagako gurasoek eratu dute Altxa Burua Atxabalta-Eskoitza taldea. Horien helburua da lanketa bat egitea, telefonoaren "erabileraren ardura gurasoena dela onartuta", eta erabakiak modu kontzientean hartzeko erremintak izatea.
Horren berri emateko herrietako ikastetxeetako arduradunekin eta alkateekin elkartu dira, eta orain, hitzaldi bat antolatu dute.
Aditu biren hitzaldia
Maitane Ormazabal eta Telmo Lazkano izango dira hizlariak, Gipuzkoako Altxa Burua mugimenduaren aholkulariak eta Nerabeen Garrasia liburuaren idazleak. "Liburu horretan nerabeen osasun mentalari buruzko hausnarketa sakona egiten da eta sare sozialek beraiengan duten inpaktu kognitiboa, emozionala eta mentala aztertu dute, gazteak telefonoari kateatuta geratzen direlako", adierazi dute taldeko kideek.
Saioa maiatzaren 23an izango da, 18:00etan, Aretxabaletako Arkupe kultur etxean. Eta bertan parte hartu ahal izateko, izena eman beharko da honako galdetegi hau beteta: https://labur.eus/GazteakEtaMugikorrak
