Bailarako herrietan langabeziak ez du igoerarik izan hilabeteko epean, Elgetan eta Eskoriatzan izan ezik, Gipuzkoako Lan Behategiak emandako datuen arabera; hurrenez hurren, bi –guztira, 26 langabe– eta hamar –guztira, 153 langabe– pertsona daude lanik gabe herri horietan.
Datu orokorrari dagokionez, 2.268 pertsona daude langabezian Debagoienean, martxoan baino 82 gutxiago –ordu hartan, 2.350– ziren, eta, hala, %7,43koa da langabezia tasa bailaran.
Herriz herri, zehazki, honakoak dira erregistratutako langabezia datuak: Antzuolan, 43 langabe (-5); Aretxabaletan, 195 (-10); Arrasaten, 1.038 (-29); Bergaran, 483 (-23); Leintz Gatzagan, 5 (=); eta Oñatin, 325 (-27). Aramaion, berriz, ez da jakinekoa zenbat langabe dauden, bost baino gutxiago direnean ez baita datu zehatza ematen.
Hego Euskal Herriko datua
Debagoienean bezalaxe, Hego Euskal Herrian ere behera egin du langabeziak azken hilabete honetan. Lanbideren eta Nafar Lansarearen bulegoetan jasotako datuak aintzat hartuz gero, 139.794 pertsona daude lanik gabe; martxoan baino 2.520 gutxiago, hain justu.
