Eneko Bidegain idazlearen (Baiona, 1975) Bichta eder nobelak irabazi du 111 Akademiaren Saria, Karmele Jaioren Maitasun kapitala nobelak baino boto gehiago eskuratu baititu azken fasean; lehia, ordea, "oso estua" izan dela nabarmendu dute hautaketan parte hartu duten akademiako 218 kideek, azkenean Bidegainen lanaren alde egin badute ere. Haien hitzetan, "bihurgune askotariko istorioa" da, "interesgarria eta hagitz gaurkoa", irakurlearen jakin-minari "bazka ematen diona behin eta berriz".
Iazko martxoaren hasieran kaleratu zuen, hain justu, Bidegainek lan hau, Elkar argitaletxearekin, eta Lapurdiko kostaldeko jauregi zahar baten bueltan sortzen den luxuzko proiektu turistiko handi baten inguruko misteriozko eleberria da; halere, hortaz harago, hainbat gogoeta gai dituen istorioa da. Horren guztiaren berri eman zuen Goiena telebistan liburua argitaratu berritan.
