Master Laboral Kutxa eskuz binakako txapelketako finalean izango da lehen aldiz Maddalen Etxegarai oñatiarra, Enara Gaminde bikotekide duela, Arrasateko Uarkape pilotalekuan, martxoaren 17an, zapatuan. Olatz Arrizabalaga eta Itxaso Erasun izango dituzte aurkari. "Bi bikoteek sendotasun handia erakutsi dute, eta final irekia eta ikusgarria espero da hamabost egun barru", adierazi dute Emakume Master Cup-eko kideek eta, aldi berean, txapelketaren antolatzaileek.
Etxegaraik eta Gamindek atzo eskuratu zuten finalerako txartela, Elgoibarren (Gipuzkoa) jokatutako bigarren finalerdian garaipena erdietsi ondoren. Amaia Aldai eta Arrate Bergara izan zituzten aurkari, eta 22-16 irabazi zieten. Hala, ondorioz, txapelketatik kanpo gelditu zen Arrate Bergara pilotari bergararra. "Txapelketa bikaina osatu duten arren, datorren urtean saiatu beharko dira binakakoaren lehen txapela lortzen".
Insausti eta Betegi
Elite mailako pilotarien partidak ez ezik, gazte eta promesa mailakoenak ere atzo jokatu zituzten Elgoibarren, eta, promesa mailari dagokionez, finalerako txartela eskuratu zuten Olatz Insausti antzuolarrak eta Irati Betegi aretxabaletarrak. Marta Gomez eta Alejandra Bilyak izango dituzte aurkari.
Irati Betegi eta Olatz Insausti, ezkerretik lehenak, atzo, Elgoibarren (Gipuzkoa).