Otsailaren 11n, aratuste igandean, Ados pilota elkarteak antolatutako binakako txapelketaren baitako bi partida jokatuko dira 11:30etan Bergarako pilotalekuan. Lehen partidan, Ruiz de Infantek eta Leire Galeano antzuolarrak, Etxekolonea eta Mendiburu izango dituzte parez pare. Bigarren partidan berriz, Arrieta eta Ruiz de Larramendi Mujika, Maddi Barrokal bergararraren eta Agirreren aurka lehiatuko dira. Hau izango da Maite Ruiz de Larramendi, pilotari beterano eta Ados elkarteko lehendakaria, Bergaran jokatzen ikusteko azken aukera, txapelketaren amaieran erretiroa hartuko du eta.
Lau hilabeteko lehia
Joan zen urteko abenduaren 16an abiatu zen Latasan (Nafarroa) Ados pilota elkarteak antolatzen duen Binakako Txapelketa Nagusia. Bertan 11 bikotek hartzen dute parte guztira, zazpik Lehen Mailako Txapelketan eta gainerako laurek Promozio Mailan. Finala apirilaren 21ean jokatuko dute Antzuolan, txapelketa lau hilabete baino zerbait gehiago luzatuz.
