Bihartik aurrera, Euskal Autonomia Erkidegoko, eta horrenbestez Debagoieneko, osasun zentroetan maskararen erabilera ez da derrigorrezkoa izango. Azken astean behera egin du arnas infekzioen intzidentzia tasak, eta horrek maskararen derrigortasuna kentzeko aukera eman dio Eusko Jaurlaritzari. Hala ere, maskararen erabilera gomendatzen dute Lakuatik, gainontzeko prebentzio-neurriak mantentzearekin batera.
Hiru astez luzatu den betekizuna
Joan zen urtarrilaren 10ean ezarri zen osasun zentroetan maskara erabiltzearen derrigortasuna, Espainiako Osasun Ministerioaren aginduz. Hala ere, neurriak zehaztapen bat jasotzen zuen: betekizuna gomendio bihur zitekeen bi astez jarraian intzidentzia tasa metatuak behera egiten zuen erkidegoetan. Hiru astez derrigortasuna mantendu ostean, azken asteetako datuen hobekuntzak aukera hau gauzatzea ahalbideratu dio Jaurlaritzari.