Madrilgo Fitur Nazioarteko Turismo azokan stand-a jarri du Debagoieneko Mankomunitateak Basquetour gunean eta bertaratzen direnek bailarako turismo eta kultura eskaintzaren informazioa jasoko dute domekara arte. Horrekin batera, gaur goizean, GR-289 Hartzaren Urratsa ibilbidea aurkeztu dute Azahara Dominguez Gipuzkoako turismo diputatuak, Angel Mari Etxabe Mankomunitateko Garapen Ekonomikoko eta Turismoko Batzordeko ordezkari politikoak eta Urdin Elortza Gipuzkoako Mendi Federazioko teknikariak. "Natura, kultura eta turismo baliabideak jasotzen dituen ibilbidea aurkeztu dugu", azaldu dute Mankomunitatetik.
Ondoren, SEGITTUR-en, espainiar estatuko turismo agentzia, Helmuga Turistiko Adimenduaren zigilua jaso dute Debagoienaz gain, beste 44k. Euskadiko kasuan, Debagoienaz gain, Bilbok, Busturialdeak, Getxok, Bidasoak eta Arabako bailarek jaso dute zigilua.
Turismo eskaintza nazioartera
Mankomunitateko teknikariak ere Madrilen daude eta haien esanetan esperientzia polita ari da izaten: "Aurten Debagoienari egokitu zaio eta bailara promozionatzeko, ezagutzeko eta kontaktuak egiteko modu bat da azokan egotea".