Abenduaren 16an eman zioten hasiera Neguko Bolak txapelketari, eta hirugarren jaurtialdia egin zuten atzo Elgetako bolatokian. Jendetsua izan zen eta lehiatua ere bai.
Markina-Xemeingo MX3 taldeko Jon Aransolo nagusitu zen sei txirlo jota. Sei jo zituzten, baita ere, Elgetako taldeko Sebas Aranzabalek eta Oier Azurmendi markinarrak. Berdinketa hausteko jaurtialdian, ordea, Aransolo nagusitu zen eta berak eraman zuen eguneko garaipena.
Ondo aritu ziren, baita ere, Aretxabaletako Jesus Mari Gorosabel, MX3eko Olatz Arano –lehen emakumea atzokoan–, eta Elgetako Josu Mañarikua. Lehenengo sei sailkatuen artean, beraz, hiru izan ziren debagoiendarrak.
Arantzabal eta Azkarate aurrean
Txapelketak Markina-Xemeingo Barinagan izango du laugarren eta azken jaurtialdia hilaren 20an, 17:00etan. Bertan erabakiko da txapelduna.
Orain arteko emaitzei erreparatuta aukera politak dituzte Sebas Arantzabalek eta Asier Azkaratek. Elgetako taldeko bolaria lehenengo doa sailkapenean hamasei txirlo jota, eta bigarren, berriz, bergararra hamabost txirlorekin.
