Urte asko daramatza bere lana euskaraz egiteko eskubidea aldarrikatzen Aramaioko medikuak, bere pazienteei osasun zerbitzu integrala euskaraz bermatzeko ahaleginak egiten, baina Euskaldunon hizkuntza eskubideen aldeko Arrasateko protokolo-ko kideek salatu dute ahalegin horrek "askotariko jazarpenak" jasatea ekarri diola. "Paziente baten larrialdietarako deribazioa euskaraz idazteagatik kontuak eskatzeko deitu zioten Arrasateko larrialdi zerbitzuetatik eta, gertaera salatzeko, ospitaleko zuzendaritzara jo zuenean ez zuen haren babesa jaso".
Bada, hori guztia salatzeko eta Montesek zerbitzua euskaraz emateko duen eskubidea aldarrikatzeko, dozenaka lagun elkartu dira gaur 13:00etan Debagoieneko ospitalearen aurrean egin den elkarretaratzean. Are, Aramaiotik ere hainbat izan dira hara bertaratu diren herritarrak, medikuari babesa adierazteko asmoz.