Azaroaren 24tik 30era iraungo du lehiaketak, eta egun bakoitzean zazpi galdera erantzun beharko dituzte partaideek, ahalik eta azkarren. Galderak askotarikoak izango dira: kultura, natura, musikagintza, geografia… Quizz dibertigarria sortu dute, eta antolatzaileen esanetan helburua da euskaraz ondo pasatzeko momentutxo bat sortzea.
Taldeka
Parte hartzeko bi eta bost laguneko taldeak egingo dira, eta talde horiek haurrekin eta helduekin osatuta egon beharko dute. Haurrek 9 eta 12 urte bitartean izan behar dituzte –LH4 mailatik LH6ra artekoak–, eta taldean, gutxienez, heldu bat egon behar da. Izena emandakoei egunero bidaliko diete esteka mugikorrera jokatzeko; 18:00etan izango da.
Finala, aurrez aurre
Aretxabaletaren kasuan, puntu gehien lortu dituzten lehen hamar taldeekin aurrez aurreko final handia egingo dute. Abenduaren 3an izango da hori, Ibarra kiroldegian.
