Nora Alonso biologoak, Mikel Mancisidor legelariak eta Luis Vega matematikariak Jakiundeko kideen botoak jaso dituzte akademian sartzeko. Bestalde, Jon Maya dantzari eta koreografoa, Oihana Otaegui ingeniaritzako doktorea, Iñaki Pinillos telekomunikazio-ingeniaria eta Gema Varona zuzenbideko doktore eta kriminologoa kide urgazle aukeratu dituzte. Horiez gain, Amaia Arranz, Sara Barja eta Aitzol Garcia, Jakiundeko kide urgazlea gazteak izango dira eta Sixto Jimenez ohorezko kide izendatu dute.
Goizean Arantzazun egin du Jakiundek urteko bigarren osoko bilkura, udazkenekoa, eta hortxe izan dira hautatuak kide berriak, akademiako kideen botoen bidez. Osoko bilkura akademiako presidente Juan Ignacio Pérez Iglesiasek eta ohorezko presidente Pedro Miguel Etxenikek gidatu dute, eta lan eta eztabaida jardunaldien ostean, datorren urterako jarduera ildoen eta garatu beharreko proiektuen diseinua eta plangintzan amaitu dute.
Jakiunde Zientzia, Arte eta Letren Akademia 2007an sortu zen zientzien, arteen, literaturaren eta gizartearen erronka handiei buruzko hausnarketa, diagnostiko eta aholkularitzarako gune bat izateko asmoarekin eta, gaur egun, 102 kidek osatzen dute. 2017an, "belaunaldien arteko ikuspegi bat" gehitzeko helburuarekin "talentu gazteak" kide urgazle gisa barnean hartzea erabaki zuen Jakiundek.
