Enplegu kooperatiboa sortzen laguntzeko, garapen ekonomiko eta soziala sustatzeko eta talde ekintzaileak garatzeko, Elkar Lan-ek prestakuntza kooperatiboa emango die LEINNeko hirugarren eta laugarren mailetako ikasleei. Enpresa-ekimena martxan jartzeko aholkularitza juridikoa emango die; batik bat, kooperatiben legeari buruzko saioak izango dira, baina langai izango dituzte aholkularitza ekonomikoa, finantzak eta kokapenak ere, besteak beste.
Aitor Lizartza Martin Mondragon Team Academyko ekintzailetza koordinatzailea eta Francisco Javier Sanz Santaolalla Elkar-Lan-eko zuzendaria izan dira lankidetza hitzarmenaren sinaduran, eta, azaldu dutenez, akordioa "aurrerapauso handia da bi erakundeek azken urteetan izan duten lankidetzan, enpresa kooperatibo berriak sustatu eta lurraldearen garapen sozial eta ekonomikoa bultzatzeko".