Bailarako txistulariak elkar ezagutzeko eta indarrak batzeko helburuarekin egin zuten, 2010ean, Eskoriatzan estreinakoz Bailarako Txistularien Eguna. Harrezkero, pandemiak baldintzatuta 2020an eta 2021ean egin ez zuten arren, urtero batu dira Eskoriatzako, Aretxabaletako, Leintz Gatzagako eta Arrasateko txistulariak eta danbor-joleak antiolaketa lanak txandakatuta.
Eskoriatzan egin dute gaur, zapatua, hamabigarren topaketa eta bailarako musikariez gainera, Oñatiko, Plaentxiko eta Baionakoak ere izan dira; guztira 45 lagun. Kale-jirarekin abiatu dute egitaraua eta ondoren, Intxartxueta eta Olaeta auzoetan eskaini dituzte emanaldi txiki bana, eguerdian, Herriko Plazan askotariko pieza alaiekin osatutako errepertorio zabalagoa eskainita. Topaketa borobiltzeko, Dorleta elkartean bazkaldu dute elkarrekin.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.