Mondragon Unibertsitateko Lanki Kooperatibismoaren Ikertegiak eta Mondragon Taldeko Otalora trebakuntza-zentroak
antolatzen duten Kooperatibagintzako Aditu Tituluaren hamaseigarren edizioa abian da eta inguruko hamabi kooperatibatako hemeretzi ordezkarik dihardu lanean horren bueltan; honako hauek: Ausolan, Copreci, Fagor Asembly, Fagor Ederlan, Fagor Electronika, Fagor Industrial, Maier, RPK, UHS, Ulma CyS eta Ulma Packaging. Humanitate eta Hezkuntza Zientzien fakultatean, Eskoriatzako campusean, elkartzen dira ordezkari horiek.
Kooperatibaren errealitatea aztertzen
Kooperatibismoaren gizarte eta enpresa-proiektua bultzatzen duten prozesuak sustatzea du helburu ikastaroak. Hori dela eta, parte-hartzaileek ezagutza teorikoak eta praktikoak jasoko dituzte kooperatibaren errealitatea ulertu eta aztertzeko. Gainera, elkarren berri emanda, beste kooperatiba batzuen esperientziak ezagutu eta horiei buruz hausnartzeko
aukera izango dute.
Mondragon Unibertsitateko Kooperatibagintzako Aditu Titulua erreferentziazko ikastaroa dela kooperatibisten prestakuntzari dagokionez adierazi dute antolatzaileek. Orain dela hamasei urte martxan jarri zenetik, 40 kooperatibatako 300 ordezkarik baino gehiagok hartu dute parte.
