Joan den asteazkenean egin zuten Finantzen Euskal Kontseiluan zerga-bilketaren aurreikuspenak eguneratzea erabaki zuten eta ondorioz, "euskal erakundeek, udalak barne, baliabide gehiago izango dituztela" azaldu du Jokin Perona Ogasun eta Finantza diputatuak. Foru Aldundiko arduradunak nabarmendu du "albiste onak direla, udalei aukera emango dielako baliabide gehiago izateko egungo egoera ekonomikoari aurre egiteko".
Bada, Debagoieneko –Aramaio izan ezik– egoerari dagokionez, honakoa da egoera:
| 2024ko aurrekontua | 2023ko aurrekontua | 2023ko itxiera aurreikuspena | 2023ko biztanleko euroak | |
| Antzuola | 1.812.631 | 1.700.818 | 1.704.685 | 823 |
| Aretxabaleta | 6.209.157 | 5.832.628 | 5.845.891 | 827 |
| Arrasate | 19.154.733 | 17.910.912 | 17.951.642 | 825 |
| Bergara | 12.746.437 | 11.962.243 | 11.989.446 | 826 |
| Elgeta | 986.233 | 926.523 | 928.630 | 828 |
| Eskoriatza | 3.667.877 | 3.400.848 | 3.408.581 | 819 |
| Leintz Gatzaga | 252.470 | 247.700 | 248.263 | 1.205 |
| Oñati | 10.148.105 | 9.394.191 | 9.415.554 | 818 |
Lurraldeko ordezkariekin bilera
Gaur, astelehena, arratsaldean Donostian egin den Gipuzkoako Finantza Kontseiluan lurraldeko udal ordezkariekin bildu da Perona, eta bertan izan dira Foru Aldundiaren ordezkari gehiago: Irune Berasaluze Gobernantzako foru diputatua; Mugikortasuneko, Turismoko eta Lurralde Antolaketako foru diputatu Azahara Dominguez; Jasangarritasunerako foru diputatu Jose Ignacio Asensio eta Zerga eta Finantza Politikako zuzendari Bittori Zabala. Horiez gainera, Eudelen izenean, Errenteriako, Tolosako, Zumaiako eta Eibarko alkateak eta Donostiako Udaleko Ogasun eta Finantza zinegotzia izan dira.
Peronak gogorarazi du "euskal erakunde-sistema arrisku partekatuko sistema dela, onerako eta txarrerako, eta albiste positiboak daudenean, erakunde-maila guztien mesedetan doala". Eta gaineratu du, "horren eraginez, UFFFak 610 milioi euro izango dituela 2023an, eta 651 milioi 2024an. Bi kasuetan, 2023rako eta datorren urterako aurreikuspen berria inoizko foru-funtsik handienak dira. Gainera, 2024aren kasuan, funtsaren zuzkidura 650 milioi eurotik gorakoa izango da lehen aldiz".
