Emakume Master Cup zirkuituaren barruko Hiru Hiriburuak txapelketaren finalak jokatuko dituzte domekan, urriaren 15ean, Bilboko Bizkaia pilotalekuan. Bergara bergararrak, Aldairekin bikote eginda, final handia jokatuko du Garai eta Zabalaren aurka. Insausti antzuolarra eta Betegi aretxabaletarra, ostera, Promesen mailako finalean izango dira.
Bost mailetan banatuta 64 pilotarik hartu dute parte Hiru Hiriburuak txapelketan eta onenak finalean izango dira, domekan. Aldai eta Bergara, eta, Garai eta Zabalaren arteko partidua 12:00etan jokatuko da eta ETBk zuzenean emango du.
Txapelketak atzetik datozen gaztetxoei ere leku egin gura izan die, eta arratsaldean, pilota goxoko eta mistoko gazte eta promesen txanda izango da. Azken hori jokatuko dute Olatz Insaustik eta Irati Betegik, Aiala Uriarte eta Marta Gomezen aurka; 18:00etan hasiko da partidua.
Astorek egindako kamiseta
Gainera, Astorek txapelketa honetarako beren beregi diseinatutako kamisetekin dabiltza jokatzen pilotariak. %100 birziklatutako ehun elastikoaz egindako jantziak dira; bakoitzak plastikozko hamaika botila daramatza, hain zuzen ere.