Abiatu da Kooltur Ostegunak ziklo berria eta aurten ere Arrasateko Gaztetxeko oholtzara igoko diren hainbat musikari Goienan ikusi ahal izango ditugu, telebistan zein nahieran (Goiena.eus atarian eta Goiena aplikazioan).
Urtero bezala, zuzenekoak Gaztetxean bertan ikusi ahal izango dituzue, eguenetan 22:00etatik aurrera. Astebete geroago, eta egubakoitzetan, 23:00etan, Goiena telebistak eskainiko du zuzenekoa.
Estilo askotariko kontzertuak
Bengo, The Movement, Munlet eta Grade 2 taldeak gonbidatu ditu, hurrenez hurren, Kooltur Ekintzak taldeak urriko eguenetarako. Hurrengo kontzertuan, urriaren 12an, The Movement talde danimarkarra izango dugu Arrasateko Gaztetxean. Talde beteranoa da eta mod-rock etiketapean kokatzen dira. Zuzeneko oso indartsudun hirukotea. Kontzertu honekin abiatuko dugu denboraldia Goiena telebistan, urriaren 20an, 23:00etan.
