Bilboko Guggenheim museoan izan zen ospakizun ekitaldia eta euskal erakunde, enpresa, politika eta gizarteko pertsona ezagunak elkartu ziren. Bertan izan ziren, besteak beste, Iñigo Urkullu lehendakaria, Tamara Yague Confebaskeko presidentea edota Antonio Garamendi CEOEko presidentea, eta Confebaskeko batzorde exekutiboa eta kontseilu nagusia.
Yaguek lankidetza publiko-pribatuan jarri zuen fokua bere hitzaldian, eta, Confebaskeko presidente ohiek une bereziki zailetan erakundea gidatzeko erakutsi duten "konpromiso pertsonala" eskertu zuen. Halaber, enpresariaren zereginak gaur egun duena baino "aitortza sozial handiagoa" merezi zuela aipatu zuen.
Omenaldia
40. urteurreneko ekitaldian Confebaskeko zortzi presidente ohiei omenaldia egin zieten: Jose Maria Vizcaino –2005ean hil zen–, Baltasar Errazti, Roman Knörr, Miguel Lazpiur, Miguel Angel Lujua, Roberto Larrañaga, Eduardo Zubiaurre eta Isabel Busto. Baita Confebasken enpresen erakunde fundatzaileei ere: Adegi (Gipuzkoa), Cebek (Bizkaia) eta SEA-Arabako Enpresak (Araba).