Tenperatura maximoak 33 gradu ingurukoak izan daitezke kostaldean, baina are altuagoak Kantauri barnealdean, eta, ondorioz, baita Debagoienean ere. Termometroek 36 graduren langa gainditzea espero da. Hala ere, arratsaldean haizeak ipar mendebaldera egingo du, eta tenperatura jaitsi egingo da.
Maximo historikoak
Eusko Jaurlaritzako Segurtasun Sailak abisu horia ezarri du gaurko, baina atzo ere beroa izan zen protagonista. Euskalmetek iragarri duenez, 30 gradukoak izan ziren tenperaturak Araba, Bizkai eta Gipuzkoako hiriburuetan, eta Aemetek ere berdina ohartarazi du Nafarroari dagokionez. Are gehiago, udalerri batzuetan 35 graduko langa gainditu zuten termometroek. Bada, 2004tik ez da horrelako tenperaturarik erregistratu urriaren hasieran Hego Euskal Herrian; ordu hartan, 30 gradu egin zituen gehienez ere, eta, beraz, markak historikoak dira.
Arrasaten, esate baterako, 35,6 gradukoa izan zen atzo tenperatura altuena; Oñatin, berriz, 33,8 gradukoa. Iaz, aldi berean, termometroek ez zituzten 25 graduak gainditu bi herri horietan.
