"Mundu zabalean euskara eta euskal edukiak lau haizetara zabaldu" gura dituen Primeran doako plataforma irailaren 15etik ikusgai dago. Ia eduki guztiak euskaraz edo euskal azpidatziekin daude, eta 3.000 atal baino gehiago izango dira han. Besteak beste, euskal produkzioko eta nazioarteko telesailak, zinea, dokumentalak, sukaldaritza, musika eta haurrentzako edukiak eskaintzen dira, baita plataformarako sortutako eduki esklusiboak ere.
Irailaren 28an, esaterako, Itxaso euskal thriller telesaila estreinatuko du Primeranek, Jon Plazaola, Nerea Mazo eta Itziar Atienza protagonista dituen euskarazko fikzio berria. Porno Belaunaldia dokumental saila ere dagoeneko ikusgai dago euskaraz.
Film luzeei dagokienez eskaintza zabala izango da: El vasco, Errementari, Nora eta Ba zen behin Euskadin, besteak beste. Nazioarteko telesailak ere ez dira faltako, euskarazko azpidatziekin: Crazy fun park, Non zinen?, Derby girl, Bila nazazu Paris… Eta dokumentalak ere badaude: Izaro: Limoiari Eztia izeneko lana eta Iribar, atezaina, esaterako, eta Ura Bere Bidean musika ikuskizuna ere bai.
Euskal eduki, kultura eta ekoizleei irekitako proiektua da eta, beraz, datozen hilabeteetan musika, antzerki edota beste kultur adierazpen eta jaialdi askotako edukiak izango direla katalogoan iragarri dute. Etorkizunean zuzenekoak ere aurreikusten dituzte.
Goienaren edukia ere bai
Tokikomen baitan elkartutako tokiko komunikabideek sortutako edukia ere jasoko dute plataforman, Goienaren edukia, esaterako. Hala, V. Danbaka musika lehiaketako kontzertuak dagoeneko ikusgai daude bertan, baita dokumental batzuk ere Gerra etxe atarian eta Vasco-Navarro trena Arrasaten, esaterako. Gainera, osatzen joango da eskaintza eta gero eta eduki gehiago izango da.
Non ikusi edukia
Esandako hori eduki guztia plataformaren webgunean ikus daiteke: primeran.eus. Baita SmartTV ezagunenetan, eta Google Play-n eta Apple App store-etan aplikazioa jaitsita, Chromecast bitartez eta Hbbtv-etan ere. Azken kasu horretan, botoi berdean. Laster gehituko zaio zerrendari Android TV.
Doako plataforma da eta erregistratzea nahikoa da.