Oñatiko San Miguel Torneoa zati erabakigarrian sartuko da aste honetan. Bihar eta eguenean erabakiko da ze bikotek jokatuko dituzten aurtengo finalak, gazte mailan zein 23 urtez azpiko kategorian. Gainera, azken honetan bi debagoiendar izango dira finalerako txartelaren lehian. Lehena lehiatzen, bihar, Ander Etxaniz bergararra izango da, Lizeagarekin bikotea osatuz, Oskoz-Oliden bikotearen aurka.
Bigarrena, berriz, Iñigo Erle oñatiarra izango da. Ostegunean izango du bere finalerdia, eta, Igoarekin bikotea osatuz, Altuna-Landa bikoteari gailentzen saiatuko dira, datorren urriaren 1ean jokatuko den finalean, beretzat, txapelketa honetan, bigarrena izango zen txapela eskuratzeko.
Hauez gain, martitzenean zein eguenean, gazte mailako finalerdiak ere jokatuko dira. Txapelketako antolakuntzatik aitortu dutenez, finalerdietako lau neurketak "oso irekiak" aurreikusten dituzte, eta, era berean, gonbita luzatzen diete zaleei ikustera gerturatzeko.
Hemen finalerdietako neurketa guztiak:
Martitzena (19:00)
- Iruzubieta III-Calvo / Gorostidi-Goiburu (Gazte maila)
- Oskoz-Oliden / Etxaniz-Lizeaga (23 urtez azpiko maila)
Eguena (19:00)
- Zubieta-Apeztegia / Sarasibar-Sotil (Gazte maila)
- Altuna-Landa / Igoa-Erle (23 urtez azpiko maila)