"Hondakinak guztiz nahastatuta, gaizki bereizita eta oso modu zikinean uzten dira. Horretaz gain, hondakin arriskutsu batzuk ere apurtuta agertzen ari dira; fluoreszenteak adibidez, horiek apurtzean barruko gas toxikoa askatzen baitute", adierazi dute ohar bidez Mankomunitateko Ingurumen Zerbitzutik.
Horregatik dei egin diete Garbigune Ibiltariaren erabiltzaileei hondakinak behar bezala bereizita eta modu garbi eta ordenatuan uzteko.
Hamar urteko ibilbidea
Debagoieneko Mankomunitateak herritar guztiei zuzendutako hiru garbigune finko –Arrasaten, Bergaran eta Oñatin– eta Garbigune Ibiltari bat dauzka martxan. Azken hori 2013an jarri zuten abian herritarrengandik ahalik eta hurbilen egon zedin zerbitzu hori. Hasieratik azpimarratu izan dute oso garrantzitsua dela hondakinak ahalik eta txukunen eta ondo sailkatuta uztea.