Astelehen arratsaldean ikusi zuen mendizale batek behorra haitz artean sartuta. Inguruko baserritar batzuei abisua pasatu zien eta ikustera joan ziren, baina, ez zuten ezer egiterik izan orduan, iluntzear zelako. Hurrengo egunean itzultzea erabaki zuten, jabeari, Mazmelako Arane baserriko Josu Zurutuzari abisua pasatu ostean. "Irten ezinik zegoela jakinarazi ziguten. Oraindik ere, ez dakigu zergatik eta zelan sartu zen han", adierazi du.
Behorra, baina, ez zen geldi egon gauean eta hurrengo egunean, hankaz gora topatu zuten haitz artean.
Hura ateratzeko elkartu ziren lau lagun jabearekin batera. Hanketatik lotu zuten sokekin eta tiraka atera: "Haitzetara lotu genuen eta poliki-poliki ateratzen joan. Minik ez zezan hartu ahal dena egin genuen".
Behin aterata, berehala jarri zen zutik eta zauriak izan arren onik zegoen: "Etzanda eta geldi egonez gero saiek eraso egiten diete. Baina ez da halakorik gertatu", adierazi du jabeak. Mazmelara jaitsi zuten gero, eta orain, baserrian izango dute oneratu arte. "Bost bat egun beharko ditu erabat sendatzeko, baina berriro Kurtzebarrira bidaltzea gurako genuke. Guk espero dugu eta berak ere bai, seguru!"
Arane baserriko Zurutuzak dozena bat behor ditu Kurtzebarrin, baita ardi mordo bat ere.
