Argiak aditzera eman duenez Prensa Comunitaria hedabidean kolaboratzen du Paolina Albani kazetariak, Mining Secrets ikerketaren gainean egin zien berba Euskal Herrira etorri zenean Mugarik Gabe GKEak gonbidatuta, apirilean.
Nazioarteko 65 kazetari inguru daude Mining Secrets horren bueltan. Eta zortzi milioi dokumentuko filtrazio bat jasota, kazetariek ondorioztatu zuten Suitzan egoitza duen Solway meatzaritza multinazionalak Guatemalan dituen bi filialek egindako kutsadura-txostenak ezkutatu dituela, tartean, herrialdeko lakurik handienekoa. Hala, adierazi zien Albanik Argiakoei eta gaineratu Solway taldeak haren baliabide finantzario eta politikoak erabili dituela Guatemalan haren interesen aldeko erabakiak har ditzaten. Multinazionalak hedabideekin duen jokabidea ere nabarmendu zuen kazetariak: informatzeagatik kriminalizatzea, esaterako.
Hala, gaurko agerraldian salatu dute Argiako kideek Solway multinazionalak Espainiako Estatuan duen abokatu bulegotik Albani kazetariari eginiko elkarrizketa ezabatzeko eskatu dietela, eta 15.000 euro ordaintzeko. Eta gaineratu dute hori egin ezean, kasua epaitegietara eramateko mehatxua egin dietela. Argi utzi gura izan dute halakorik ez dutela egingo eta kazetaritza independentea aldarrikatzen jarraitzeko asmoa agertu dute.
