Malen Osa oñatiarra, Ainara Urrutia aretxabaletarra, Oihana Kortazar elgetarra eta Ibai Larrea antzuolarra Innsbrucen (Austria) daude egunotan, Munduko Txapelketan. Espainiako hautatzaileak guztira 40 mendi lasterkari aukeratu ditu duela urte erdi Thailandian eskuratu zituzten zazpi dominen marka hobetzeko helburuarekin, eta esan moduan, Debagoieneko lau atleta daude aukeratu horien artean.
Gaur, eguaztena hasi dute Mundiala, eta atariko proban, kilometro bertikalean (7 kilometro eta 1.020 metro), Malen Osa 41. postuan sailkatu da. Oso igoera azkarra izan da, eta Osak 55.56ko marka egin du. Oñatikoak bizpahiru egun izango ditu indarrak errekuperatzeko, oraingo zapatuan (14:00) izango du-eta hurrengo lasterketa, 15 kilometrotako proba: "23 urtez azpiko kategoriarik ez dagoenez elite mailakoekin hartuko dut parte, eta mundu mailako erreferentak izango ditut hor. Egia esan ikastera noa Mundiala, ez dut helburu konkreturik, daukadan onena eman eta esperientzia bizi izatera noa", adierazi zuen Osak joan den astean.
Kortazarrek eta Urrutiak, eguenean
Oihana Kortazarrek eta Ainara Urrutiak bihar, eguena, izango dute 45 kilometrotako proba gogorra (09:00). Hain zuzen, lasterketa horretan ez da Munduko txapelduna den Denisa Ionela Dragomir errumaniarra egongo, baina bai izango dira Barbora Macunoca txekiarra eta Emilia Brangefalt. Hain zuzen, aurreko edizioan Oihana Kortazar laugarrena izan zen. Bada, 45 kilometrotan 3.000 metro pasatxoko desnibela gainditu beharko dute.
Larreak ere zapatuan
Esan moduan, Malen Osak zapatuan (14:00), izango du 15 kilometrotako lasterketa, proba klasikoa deritzona, eta iazko irabazle Ugandako Rebecca Cheptegei da faborito nagusia. Gizonezkoetan ere beste debagoiendar bat izango da distantzia berean lehian, Ibai Larrea antzuolarra. Horiek ere emakumezkoen ibilbide berbera izango dute (12:00). Iazko Mundialean podiuma erabat afrikarra izan zen, eta iazko azpitxapelduna izango da Innsbruckeko irteera puntuan, Patric Chemutai.
Lasterketa guztiak streamingez jarraitu daitezke, hemen.