Nabarmendu dutenez, 30 urteotan udal administrazioetan "ahalegin handia" egin da euskararen erabilera sustatzeko, eta Debagoieneko udal zerbitzuetan euskara da zerbitzuetarako eta lanerako hizkuntza. Haien arabera, "ia langile guztiek" dute euskaraz lan egiteko gaitasuna, eta zinegotzien kasuan ere euskararen ezagutza halabeharrezkoa dela uste dute. "Egin den ahaleginari eusteko eta normalizazioan pauso berriak emateko ezinbestekoa da udal hauteskundeetako zerrendetako ordezkariak euskaldunak izatea, edo gutxienez euskaraz ulertzea".
Era horretan, herritarrek hauteskundeetan egiten duten hausnarketan eragin nahi da, arreta eurengan jarrita. "Azken batean, herritarren esku dago bozka zein alderdik jasoko duen eta garrantzitsua da euskara ere hizpide izatea. Bereziki, horretan jarri nahi du indarra kanpainak".
