Hain justu, Arrasaten sinatu dute hitzarmena, eta Josu Waliño fundazioko zuzendariaren arabera, hitzarmen honek saltokien digitalizazioan laguntzea du helburu, euskara erdigunean kokatuta. "Horretarako, gure hornitzaileen bidez, hosting zerbitzuak prezio berezian eskuratzen ahaleginduko gara, Dendartean elkarteko kideei laguntzeko asmotan".
Xabier Aldalur Dendartean-eko teknikariak ere nabarmendu du domeinuaren erabilera sustatuko dutela bazkideen eta saltokien artean, baina "arreta berezia" jarriko dutela webgunean duten edo izan nahiko luketen horiengan. "Dendartean aspalditik ari da merkatari txikien digitalizazioa bultzatzen, saltokien lehiakortasuna hobetzeko teknologia berriak erabiltzen. Alabaina, arlo digitalean ere betiko saltokien esentzia eta baloreak mantentzea garrantzitsua da, eta, nola ez, euskararen erabilera".
Jarraipen batzordea abiatuko dute
Hitzarmenean zehaztutakoa betetzen dela bermatzeko jarraipen batzorde bat abiatuko dute, eta, gutxienez, erakunde bakoitzeko kide bana izango da parte. Lau hilean behin elkartuko dira, eta akordioaren inguruan sor daitezkeen zalantzak eta arazoak konpartituko dituzte, hobekuntzak aurreikustearekin batera.