Sailkapenean 10 puntuko aldearekin aurkeztu da Mondrate Eskoriatzaren kantxan, bata bosgarren eta bestea hamargarren, baina derbietan jakina da etxeko taldeak abantailarekin hasten duela partidua, eta zapatu arratsaldekoa ez da salbuespena izan. Hitzordu berezietako trajea jantzi du Manuel Muñoz kiroldegiak, jendez gainezka eta bero-bero.
Kosta egin zaie jokalariei aurkariaren atea zulatzea. Mondratekoek akatsa egin dute atzean, pase horizontal bat huts eginda, eta eskoriatzarrek ederto baliatu dute aukera. 15. minutuan aurreratu dira 1-0, eta halaxe joan dira atsedenaldira.
Bigarren zatian jaun eta jabe izan da Eskoriatza. Epaileak hasteko txistua jo eta 15 segundora iritsi da bigarren gola. Bi minuturen bueltan 3-0 zihoazen aurretik, eta laugarrena ere segidan etorri da, penaltiz. Arrasatearrek markagailua makilatzea lortu dute 4-1ekoarekin, eta jokalari-atezaina atera dute erasora oldartzeko. Arriskuak hartu dituzte eta etxekoak argi ibili dira, azken minutuetan beste bi gol sartzea lortu baitute. Amaieran, 6 eta 1. Denboraldia bukatzeko geratzen diren lau partiduetarako konfiantza pilatu du Eskoriatzak, eta Mondratek lanean jarraitu beharko du goiko postuen ehizan segitzeko.
