Bergarako pilota elkartea da antolatzailea, eta, azaldu duenez, txapelketak 74. aldia izango du aurten; ia bi hilabetekoa izango da. Hain justu, nagusienek ekingo diote lehiaketari. Bihar bertan jokatuko dute lehen partida, Aretxabaletaren eta Soraluzeren artekoa, Aretxabaletan, 11:30ean. Horrez gain, Aloña Mendi taldeko bi bikote ere arituko dira lehian nagusien mailan; Bergaratik, beste bi; eta, Elgoibartik, bakarra.
Kadeteak eta jubenilak, berriz, maiatzaren 1etik 7ra bitartean hasiko dira partidak jokatzen. Kadeteetan, bailaratik, Aretxabaletako bi talde eta Bergarako bat arituko dira jokoan, eta alboan izango dituzte elgoibartarrak ere. Jubeniletan, Aloña Mendiko eta Bergarako pilotariek jokatuko dute, soraluzetarrekin batera.
Finalei dagokienez, ekainaren 18an jokatuko dira Bergarako udal pilotalekuan, baina momentu horretara iristeko, aurreko partidak jokatu beharra dago.
Parte hartzea, handiagoa
Txapelketaren edizio honetan bikoterik izan ez arren, antolatzaileek nabarmendu dute Arrasateko, Antzuolako eta Eskoriatzako pilotariek ere parte hartu izan dutela txapelketan; eta, Debagoienetik kanpo, baita eibartarrek eta debarrek ere. Are, erantsi du "hau egitea ez litzatekeela posible izango" babesleengatik ez balitz.