Euskal Herriko gailur, leku eta herri esanguratsuenetara musika eraman, eta inguruko pertsonak eta herriak elkarrekin harremanetan jarriko ditu Urmuga 2023 ekimenak. Gaur aurkeztu dute, Donostian, eta mendi ibilaldien, kontzertuen eta artisten egitaraua zehaztu.
Debagoienean uztailaren 16an, domeka, sartuko da. Urkiola parke naturalaren bihotzean hasiko dute etapa; Anboto (1.296 m) zeharkatu eta Orixol (1.127 m) igota iritsiko dira Arlabanera mendizaleak. Bederatzi orduko ibilaldia izango dela aurreratu dute.
Uztailaren 17an, astelehena, Arlabanen ekingo diote etapari eta Elgea mendilerroa zeharkatuko dute gainik gain: Aumategi (1.192 m), Mugarriluze (1.109 m) eta Usakoetxena (920 m). Urbian bukatuko dute zazpi ordu pasatxo egin ostean.
Hurrengo egunean, hilaren 18an, Urbian ekingo diote ibilbideari eta Arbelaitzetik Aizkorrira joango dira hainbat tontor igarota: Aitxuri (1.551 m) eta Aketegi (1.549 m). Otzaurteko portuan bukatuko dute eguna, bederatzi ordu inguruko ibilaldia eginda.
Kontzertuak ere izango dira hainbat herri, mendi eta natura eremutan, baina oraingoz, ez dute halakorik aurreikusi Debagoienean.