Debagoieneko Ikasle Abertzaleek oso garrantzitsutzat dituzte greba eta mobilizazioak: "Ikastetxeetan gero eta kontrol handiagoa ikusten dugu. Hezkuntza jendarte sumisoa eraikitzeko tresna bat da. Era berean, ikasleriaren zati handi batek arazoak ditu ikasketa-prozesua burutzeko. Eskola partikularren auzia da horren adibide; ikasleen erdiek jaso behar dituzte".
Salatu dute gaur egungo heziketa normakuntzan baino gehiago diziplinamenduan oinarritzen dela: "Nolako hezkuntza daukagu? Zazpi orduz ikastetxean egoteaz gain eskola gehiago jasotzea ia ezinbestekoa bada, ikasleriaren artean beharrezkoa da egoera hau aldatzea. Horretarako, lehenengo urratsa dira osteguneko mobilizazioak".
Debagoienean kurtso hasieratik dabiltza lanean hainbat ikastetxetan. Azken asteotan aurkezpenak egin dituzte gai horren harira. IAk azaldu duenez, eskualdeko ia institutu guztietan egingo da greba, zazpitan. Lanbide Heziketa zentroetan ere jardun dute lanean, eta hirutan greba egingo dela aurreikusten dute. Asmoa da Debagoienetik ahalik eta ikasle gehien joatea Donostian izango den mobilizaziora. Horretarako, autobusak antolatu dituzte Aretxabaletatik, Arrasatetik, Oñatitik eta Bergaratik.