Nojako eta Beasaingo hitzorduen ondoren asteburuan Espainiako Kopako hirugarren lasterketa puntuagarria jokatu dute, Galizian. Guztira taldeko bost txirrindulari izan dira Rias Baixetan ospatutako lasterketan, eta Igamo Packaging taldeko neskek emaitza onak batu dituzte.
Eguneko lehen lasterketan, kadeteena, hiru ordezkari izan ziren: Arantxa Anduaga, Itxaso Askasibar eta Maddi Oleaga. Hirurek lasterketa amaitzea lortu zuten. Aipagarriena, Askasibarrek lortutako 13. postua, eta emaitza horrekin sailkapen orokorrean 15. posturaino igo da. Gainera, Igamoko neskek taldeka 10. postua lortu zuten.
Ondoren, gazte mailakoen txanda izan zen. Igamo taldeak bi ordezkari aurkeztu zituen. Itxaso Plaza eta Edurne Ormaetxea. Plaza lehen tropelean iritsi zen, A Porteliñako mendatea onenekin batera pasatuta, eta Ormaetxea bigarren tropeltxoan iritsi zen. Hurrenez hurren, 14. eta 24. postuak erdietsi zituzten eta sailkapen orokorrean ere pauso bat aurrera eman dute. Itxaso Plazak 14. posturaino eta Edurnek 36. posturaino. Espainiako kopako hurrengo proba Leonen izango dute, apirilaren 22an, baina aurretik, Lea Artibai challengean lehiatuko dira, apirilak 14 eta 16 bitartean.
