Udaberrian sartu berri gara asteon: hain zuzen, martxoaren 20 iluntzean. Atzean geratu berri den negua beroa eta lehorra izan da. Honela azaldu du Euskalmeteko meteorologo Eguzkiñe Iturriotzek: "Ez du denean giro bera egin: mendebaldeko kostaldean giroa oso hezea izan da, baina barrualdean lehorra". 2022ko abendua, adibidez, inoizko beroena izan dela azaldu du: "Inoizko abendu beroena izan da aurtengo negukoa. Urtarrilaren bigarren hamabostaldian sartu ginen benetako negu giroan. Urtarrilaren 16tik 19rako egunetan, esaterako, neguko denboralea izan genuen. Euria erruz egin zuen, baita elurra eta haizea ere". Otsailean, berriz, izotz-egun asko izan zirela nabarmendu du. "Otsailaren 23an elurra kota ertainetan egin zuen, baina 27an itsas mailaraino jaitsi zen elurra", dio. Batez beste, neguko tenperatura 7,8 gradu izan da.
Euri gutxi egin du
Arrasateko estazio meteorologikoko datuei erreparatuta, hauxe dio Iturriotzek: "Arrasaten euri gehien egin zuen eguna urtarrilaren 16a izan zen: 41,6 litro egin zituen metro koadroko. Negu osoan, aldiz, 290,7 litro egin ditu metro koadroko". Datu hori txikia dela nabarmendu du: "Iazkoa ez zen negu euritsuena izango, eta 576,6 litro egin zituen".
Urkulu %70,59ko betetze-mailan dago, azken urteetako mailarik baxuenean. 2022an, esaterako, %98,89ko betetze-mailan zegoen.
Udaberriko lehenengo egunak gorabeheratsuak izango direla dio Iturriotzek, baina luzera begirako iragarpenak egiteko oraindik goizegi dela ere esan du Euskalmeteko meteorologoak.
Neguko datuak
Euskalmetek Arrasateko estazio meteorologikoan hartutako datuak dira –318 metroko altueran–.
- Tenperatura maximoa: martxoaren 16an, 24,9 gradu, 13:00etan.
- Tenperatura minimoa: otsailaren 11n, -3,0 gradu, 06:50ean.
- Prezipitazio guztia, 24 ordutan: urtarrilaren 16an, 41,6 litro metro koadroko.
- Prezipitazio bako egunak: 52 egunetan ez du euririk egin.
- Prezipitazio egunak:39 egunetan egin du euria.
- Urkuluren egoera: %70,59ko betetze-mailan dago –Gipuzkoako ur kontsortzioko datua–.
