Debagoiendarren arteko derbia izango da asteburuan. Bergarakoak egoera delikatuan daude, azkenaurreko postuan eta sailkapenean hurrengo taldea bederatzi puntura –Amaikak Bat Mutriku–. Leintzekoak, berriz, seigarren daude, baina egia da azken hilabetean partidu bakarra irabazi dutela; hori bai, galdu dituzten partiduetatik bi kontrario gogorren kontra izan da: Mariñoren eta Realaren kontra, hain zuzen.
Asteburuan, berriz, sailkapenak erakusten duenak gutxirako balioko du, eta mahoneroak joaneko partiduan jaso zuten jipoiaren errebantxa hartzeko gogoz egongo dira.
Gizonezkoek kanpoan
Mondrak, Bergarak, Aretxabaletak eta Aloña Mendik etxetik kanpora jokatuko dute asteburuan, eta, bereziki, bergararrendako eta oñatiarrendako urduritasunez betetako beste jardunaldi bat izango da: mahoneroek Elgoibarren kontra jokatuko dute eta oñatiarrek, berriz, Zumaian. Ordutegiak, hemen.