Elgetako kaleetan, esate baterako, elurra pilatzen hasi da; Debagoieneko herririk altuenean, alegia. Eguraldiak, gainera, eragina izan du errepideetan ere. Trafiko Sailetik adierazi dute mendateak zabalik egon arren, kateak behar direla Kurtzetan. Horrez gain, Gatzagan, Pagatzan, Deskargan eta Arantzazun arretaz gidatu behar da.
Lurraldebus-ek bertan behera utzi ditu autobus linea batzuk. Leintz Gatzagatik Arrasateko ospitalera doan autobus zerbitzua ez dago, eta ezta Bergaratik Elgetara artekoa ere.
Eguraldiaren iragarpena
Euskal meteorologia agentziak iragarri du balio altuenak 2 eta 6 graduren bueltan izango direla gaur, eta, gainera, izotza ere egin dezakeela.
Bihar, martitzena, ere negu giroa izango da nagusi. Tenperatura maximoak zertxobait igo daitezke, baina hotz egiten jarraituko du, ipar-haizearen eraginez. Behe-hodei asko ere agertuko dira eta prezipitazio txikia egingo du. Elur-kotak, berriz, 100 eta 400 metro inguruan jarraituko du.