Iragarritako legez goizean goiz prezipitazio apur bat egin du eta boladaka errepideak zuritu ditu zertxobait. Dena den, elur txikiak ez du oraingoz trabarik eragin. Debagoienari dagokionez, Trafiko Sailetik adierazi dute Kurtzeta, Gatzaga, Pagatza eta Deskarga mendateetan kontu handiarekin gidatu behar dela, elurra ari duelako.
Euskal meteorologia agentziak iragarri du giro motela izango dela gaur, astelehena. Atzo baino prezipitazio apur bat gehiago egingo du, batez ere eguerdi partean, eta orduan zaparrada mardulagoak bota ditzake. Iparraldeko haizea zakar ibiliko da bereziki mendi inguruetan eta tenperaturari dagokionez, balio altuenak 2 eta 6 graduren bueltan izango dira. Gainera, izotza egingo du.
Gaur, 07:30ean, Arrasatetik Aretxabaletara doan errepide ingurua.
Bihar, martitzena, ere negu giroa izango da nagusi. Tenperatura maximoak zertxobait igo daitezkeela esan du Euskalmetek, baina hotzetik jarraituko dutela horiek ipar-haizearen eraginez. Behe-hodei asko agertuko dira eta prezipitazio txikia egingo du; elur-kotak baxu jarraituko du, 100 eta 400 metro inguruan.
