Azken jardunaldietako emaitzak ikusita bistan da Bergarak ez duela amore emateko asmorik. Eta mahoneroena da jaitsiera postuetan dagoen lehen taldea, beherago daude-eta Vasconia eta Mondra, oraindik eta egoera zailagoan. Bada, Bergarak erresistentziarako erakutsi duen jarrerak –azken hiru partiduak jarraian irabazi dituzte– are eta gehiago estutu ditu atzealdeko postuak, eta orain momentuan asko dira atzerako ispiluari begira dauden taldeak. Hala, datozen jardunaldietan bi partidu jarraian irabazteak sekulako saria izan dezake, eta, kontrara, bi emaitza txar pilatzeak zigor galanta. Eta presio horrekin egingo dute salto asteburuan bailarako taldeek berdegunera.
UDA eta Mondra, etxean
Etxean jokatuko duten Mondrak eta Aretxabaletak sailkapenean lasai dauden bi talde izango dituzte aurrean. Arrasatekoek hirugarren dagoen Eibarren bisita izango dute Mojategin (zapatua, 16:30), eta, mailari eustea oso zail daukaten arren, azkenera arte lehiakor izan nahi dute zuri-moreek. Aretxabaletak, berriz, seigarren postuan dagoen Debako Amaikak Bat taldea mendean hartu nahi du Ibarran domekan (16:30).
Bergara, liderraren etxera
Etxetik kanpora jokatuko dute Bergarak eta Aloña Mendik, eta, mahoneroen kasuan, plaza zailean egin beharko dute dantzan: Hernani kategoriako liderra da eta orain arte etxean partidu bakarra galdu du. Zapatuan jokatuko dute, 16:00etan. Joan den astean irabazita arnasa hartu duen Aloña Mendik, azkenik, Urolaren zelaian jokatuko du bihar, 16:00etan.