Euskal Meteorologia Agentziaren iragarpenek adierazi dutenez elur kota jaisten hasiko da gaur, eta, horregatik, Aldundiko koordinazio-taldeak eta teknikariek lanean eta dispositiboa prestatzen jardun dutela adierazi du Eider Mendozak, Aldundiko bozeramaileak.
Zuhurtziaz jokatzeko deia egin du, batez ere, kontuz ibiltzeko eskatuz. Bozeramaileak gogorarazi du horrelako aurreikuspenen aurrean zentzuzkoena dela ibilgailua behar-beharrezkoa den kasuetan bakarrik erabiltzea, eta beti ere ziurtatuta "ibilgailua egoera onean eta baliabide egokiekin" dagoela. Bereziki ibilgailu astunen gidariak aipatu ditu; gogorarazi die elurra eginez gero guztiz debekatuta dagoela ezkerreko erreitik aurreratu eta zirkulatzea, elurra kentzeko makinek eta larrialdietarako ibilgailuek beren lana egin ahal izan dezaten.
Euskalmetek emandako elur abisua 1.000 metrotik beherakoa denean, orain legez, edo izotz-abisuak daudenean aktibatzen du Aldundiak Neguko Bidezaintza Plana. Bidegiko neguko bide-dispositiboan bi zentro daude lurraldeko errepide nagusienetarako, hau da, AP-8, AP-1 eta A-636 errepideetarako. Bata, Bergarako iparraldeko sarreran, AP-1 eta A-636 errepideen beharrei erantzuteko, eta bestea, AP-8an, Zestoa-Zumaiako sarreran. Bi zentroek "kokapen egokia" dute makinek ahalik eta lasterren erantzuteko autobideen beharrei.