Eskoriatzako Joseba Iñurrategi pilotalekuan elkartu dira alebin eta infantil mailako bailarako pilotariak. Arizmendi Kirol Elkarteak antolatuta emakume pilotarien topaketa egin dute gaur arratsaldean. Eskoriatzako, Aretxabaletako, Arrasateko, Bergarako, Oñatiko, Antzuolako eta Soraluzeko pilotariak elkartu dira, guztira 15.
Urduritasun puntua
Lagunarteko lehia izan da; izan ere, helburua pilotaz gozatzea izan da. "Guztira zortzi lehia jokatu dituzte, buruz-burukoak eta binakakoak, 8 tantotara", azaldu du Gorka Gabilondok, Arizmendi Kirol Elkarteko arduradunetako batek. "Pozik geratu dira. Esan behar da batzuendako lehenengo aldia zela frontoian zuriz zeudela... urduri etorri dira baina gustura ibili dira", azaldu du Gabilondok. Izan ere, pilotari horietako askok entrenatu bakarrik egiten dute, ez dute lehiatzeko aukerarik izaten.
"Helburua neskak pilotan egitera animatzea da, eta ea poliki-poliki eskolartekoren bat antolatzeko aukera dugun", gehitu du.
Hurrengo topaketa Antzuolan izango da, martxoaren 11n; eta, Aretxabaletan, apirilaren 22an.